ຖ້າຂ້າພະເຈົ້າມີສູດລັບ ທີ່ຈະເຮັດໃຫ້ຕົວເອງກາຍເປັນຄົນເກັ່ງ ແລະ ມີຊື່ສຽງໄດ້ ຂ້າພະເຈົ້າຄົງບອກທຸກທ່ານທີ່ສົນໃຈໃຫ້ຮູ້ໄປດົນແລ້ວ. ເທົ່າທີ່ຂ້າພະເຈົ້າມີກໍ່ພຽງແຕ່ ສູດທີ່ບໍ່ຄ່ອຍເປັນຄວາມລັບປານໃດ ເຊິ່ງມັນແມ່ນ “ການສ້າງຜົນງານທີ່ດີ” ແລ້ວເອົາໄປແບ່ງປັນໃຫ້ຄົນອື່ນເບິ່ງນຳ. ເຊິ່ງມັນປະກອບດ້ວຍ 2 ຂັ້ນຕອນຄື:

ຂັ້ນຕອນທີ 1: ສ້າງຜົນງານທີ່ດີ ເຊິ່ງຂັ້ນຕອນນີ້ເປັນຂັ້ນຕອນທີ່ຍາກຫຼາຍ ແຖມຍັງບໍ່ມີທາງລັດອີກ. ເຮົາຕ້ອງສ້າງຜົນງານຂອງໂຕເອງອອກມາ ທຸກໆມື້ ແລະ ທຳໃຈໄວ້ກ່ອນເລີຍວ່າ ຜົນງານຂອງເຮົາທີ່ເຮັດມັນອອກມານັ້ນ ອາດຈະບໍ່ເປັນທີ່ໜ້າສົນໃຈ ແລະ ອາດຈະລົ້ມເຫຼວ ຢູ່ຫຼາຍຜົນງານ ເຊິ່ງມັນຈະເປັນການສອນໃຫ້ເຮົາໄດ້ຮຽນຮູ້ ແລະ ເປັນປະສົບການ ເຮັດໃຫ້ເຮົາຄ່ອຍໆພັດທະນາຕົວເອງໃຫ້ເກັ່ງຂຶ້ນ.

ຂັນຕອນທີ 2: ແບ່ງປັນໃຫ້ຄົນອື່ນໄດ້ເບີ່ງ ແລະ ຮູ້ນຳ 10 ປີກ່ອນຂັ້ນຕອນນີ້ ອາດຈະເປັນເລື່ອງທີ່ຍາກ ແຕ່ປະຈຸບັນມັນເປັນເລື່ອງທີ່ງ່າຍດາຍຫຼາຍ ດ້ວຍການເອົາຜົນງານຂອງເຮົາໄປລົງໃນ ອິນເຕີເນັດ.

ທ່ານອາດຈະສົງໄສວ່າ “ແລ້ວເຮົາຈະມີເຄັດລັບໃນການໃຊ້ອິນເຕີເນັດແນວໃດ ”

ຂັ້ນທຳອິດ: ສົງໄສ ອີຫຍັງຈັກຢ່າງ, ຂັ້ນທີສອງ: ຊວນຄົນອື່ນມາສົງໄສກັບເຮົາ. ເຮົາຄວນຈະສົງໄສໃນສິ່ງທີ່ບໍ່ຄ່ອຍມີຄົນສົນໃຈ. ຖ້າໃຜສົນໃຈເລື່ອງໝາກແອັບເປີ້ນ ເຮົາກໍ່ຄວນຈະໄປສົນໃນເລື່ອງຂອງໝາກກ້ຽງແທນ. ຍິ່ງທ່ານແບ່ງປັນຄວາມມັກ ຫຼື ຄວາມຢາກຮູ້ຂອງທ່ານຫຼາຍປານໃດ ຄົນອື່ນກໍ່ຍິ່ງຈະຮູ້ສຶກໃກ້ຊິດກັບຜົນງານຂອງທ່ານຫຼາຍຂຶ້ນເທົ່ານັ້ນ. ສິລະປິນ ບໍ່ແມ່ນນັກມາຍາກົນ ບໍ່ແມ່ນເລື່ອງເສຍຫາຍ ຖ້າເຮົາຈະເປີດເຜີຍຄວາມລັບບາງຢ່າງໃຫ້ຄົນຮູ້ແນ່.

ເມື່ອທ່ານເປີດເຜີຍວິທີການໃນການສ້າງຜົນງານຂອງທ່ານ ແລະ ຊວນໃຫ້ຄົນອື່ນເຂົ້າມາມີສ່ວນຮ່ວມນຳ. ຕົວເຮົາເອງກໍ່ຈະໄດ້ຮຽນຮູ້ນຳເຊັ່ນກັນ.

ເຮົາບໍ່ໄດ້ເຂົ້າມາໂລກອິນເຕີເນັດ ຍ້ອນວ່າເຮົາມີເລື່ອງຢາກເລົ່າໃຫ້ຄົນອື່ນຟັງເທົ່ານັ້ນ ແຕ່ເຮົາຍັງຈະສາມາດໄດ້ຟັງເລື່ອງເລົ່າຂອງຄົນຄືນໄດ້ເຊັ່ນກັນ. ອິນເຕີເນັດອາດຈະບໍ່ເປັນພຽງແຕ່ບ່ອນທີ່ເຮົາສາມາດເຜີຍແຜ່ຜົນງານຂອງເຮົາເທົ່ານັ້ນ ມັນອາດຈະເປັນເຄື່ອງມືໃຫ້ເຮົາໃຊ້ໂບ່ມຄວາມຄິດທີ່ຍັງບໍ່ເປັນຮູບເປັນຮ່າງ ຫຼື ຍັງບໍ່ສົມບູນແບບ ຫຼື ເປັນສູນກາງໃນຊອກຫາແນວຄວາມຄິດໄໝ່ໆ ເພື່ອພັດທະນາຜົນງານຂອງເຮົາໃນອະນາຄົດອີກດ້ວຍ.

ສີລະປິນຫຼາຍຄົນອາດຈະຢ້ານວ່າ ການເປີດເຜີຍຕົວເອງໃນໂລກອິນເຕີເນັດ ຈະເຮັດໃຫ້ພວກເຂົາມີເວລາສ້າງຜົນງານໜ້ອຍລົງ ແຕ່ຂ້າພະເຈົ້າພັດເບິ່ງໃນທາງທີ່ກົງກັນຂ້າມກັນ. ຂ້າພະເຈົ້າຄິດວ່າມັນຈະຊ່ວຍກະຕຸ້ນໃຫ້ຂ້າພະເຈົ້າເຮັດວຽກໄດ້ຫຼາຍຂຶ້ນ. ເວັບໄຊທ໌ ແລະ ບລ໋ອກ ສ່ວນຫຼາຍຈະລຽງລຳລັບ ບົດຄວາມ ຫຼື ຂໍ້ຄວາມ ຈາກໃໝ່ສຸດ ໄປຫາ ເກົ່າທີ່ສຸດ ເຊິ່ງນັ້ນໝາຍຄວາມວ່າ ບົດຄວາມ ຫຼື ຂໍ້ຄວາມລ່າສຸດ ຂອງທ່ານ ແມ່ນສິ່ງທີ່ຜູ້ເຂົ້າເບິ່ງເວັບ ຫຼື ບລ໋ອກ ຈະເຫັນເປັນສິ່ງທຳອິດ ແລະ ພວກເຂົາຈະຕັດສິນທ່ານຈາກບົດຄວາມ ຫຼື ຂໍ້ຄວາມລ່າສຸດ ຂອງທ່ານນີ້ແຫຼະ ຜົນທີ່ຕາມມາ ແມ່ນ ເຮົາຈະຕ້ອງຕື່ນໂຕຢູ່ຕະຫຼອດເວລາ ເຮົາຕ້ອງຄິດຕະຫຼອດເວລາວ່າຈະຂຽນອີ່ຫຍັງ ຫຼື ເຮັດຫຍັງຕໍ່. ການມີບ່ອນເກັບມ້ຽນໄອເດຍ ຈະ ຊ່ວຍກະຕຸ້ນໃຫ້ເຮົາຄິດສີິ່ງຕ່າງໆອອກມາເກັບໄວ້ໃຫ້ມັນເຕັມ. ເມື່ອໃດກໍ່ຕາມທີ່ເຮົາຮູ້ສຶກສັບສົນ ເຮົາສາມາດເບີ່ງຄືນໄດ້ ວ່າຜ່ານມາເຮົາໄດ້ເກັບຫຍັງມ້ຽນໄວ້ແນ່, ເຮັດຜົນງານຫຍັງອອກມາແນ່ ແລະ ຖາມຕົວເອງວ່າເຮົາຈະເອົາຫຍັງໄປເກັບມ້ຽນໃສ່ຕື່ມອີກໄດ້ແນ່.

 

ທີ່ມາ: ໜັງສື ລັກແບບສີລະປິນ “STEAL LIKE AN ARTIST” ໂດຍທ່ານ ​Austin Kleon