ໃນຊ່ວງ 2-3 ປີຜ່ານມານີ້ ສະມາດໂຟນໄດ້ຮັບການພັດທະນາຢ່າງກ້າວກະໂດດ ທັງດ້ານຮາດແວຣ໌ ແລະ ຟີເຈີ້ຕ່າງໆ. ໃນຂະນະທີ່ການອອກແບບຂອງໂນດບຸກນັ້ນ ພັດບໍ່ຄ່ອຍມີຫຍັງແປກໃໝ່ຫຼາຍເມື່ອທຽບໃສ່ສະມາດໂຟນ ເຊິ່ງອາດເປັນຍ້ອນວ່າ ສະມາດໂຟນເປັນສິ່ງທີ່ຄົນເຮົາຕ້ອງການສຳພັດ ແລະ ຢາກຖືໄປຫັ້ນໄປນີ້ ເພື່ອໃຊ້ງານໃນຊີວິດປະຈຳວັນຫຼາຍກວ່າ.

ສະນັ້ນ ເຮົາມາລອງເບິ່ງວ່າ 6 ຟີເຈີ້ ເດັ່ນໆຂອງສະມາດໂຟນ ທີ່ມັນຈະດີຫຼາຍຖ້າວ່າເອົາມາໃສ່ໃນໂນດບຸກ ແລະ ຄິດວ່າມັນຄົງຈະເຮັດໃຫ້ໂນດບຸກມີຄວາມໂດດເດັ່ນຫຼາຍຂຶ້ນ.

1. ໜ້າຈໍ OLED

ໜ້າຈໍ OLED ໃນສະມາດໂຟນນັ້ນບໍ່ພຽງແຕ່ສະແດງສີສັນຂອງພາບອອກມາໄດ້ສົດໃສກວ່າ ແລະ ຄອນທຣາດລະດັບສຸດຍອດກວ່າຈໍ LCD ເທົ່ານັ້ນ ແຕ່ມັນຍັງໃຊ້ພະລັງານໜ້ອຍກວ່ານຳອີກ ເຊິ່ງເປັນຜົນດີຕໍ່ການໃຊ້ພະລັງງານຈາກແບັດເຕີຣີໂດຍກົງ.

The OLED displays of top smartphones.

ໃນປັດຈຸບັນມີພຽງໂນດບຸກບາງລຸ້ນທີ່ໄດ້ເລີ່ມໃຊ້ໜ້າຈໍ OLED ແນ່ແລ້ວ ແຕ່ສ່ວນຫຼາຍກໍ່ຍັງຄົງໃຊ້ຈໍ LCD ຢູ່ ເຫດຜົນຫຼັກໆທີ່ຍັງໃຊ້ຢູ່ນັ້ນແມ່ນ ແຜງໜ້າຈໍ OLED ນັ້ນຍັງມີລາຄາທີ່ແພງຢູ່ ເຊິ່ງມັນຈະໄປກະທົບຕໍ່ຕົ້ນທຶນການຜະລິດຂອງເຂົາເຈົ້າ.

2.ສະແກນໃບໜ້າປົດລ໋ອກເຄື່ອງ (ສຳລັບ Mac)

ຟີເຈີ້ Face ID ຢູ່ iPhone ລຸ້ນໃໝ່ ສຳລັບສະແກນໃບໜ້າເພື່ອປົດລ໋ອກເຄື່ອງ ແລະ ເຂົ້າເຖິງການບໍລິການຕ່າງໆນັ້ນ ເປັນຟີເຈີ້ທີ່ມີຄວາມລຳ້ໜ້າຫຼາຍ ແລະ ອຳນວຍຄວາມສະດວກໃຫ້ຜູ້ໃຊ້ງານໄດ້ເປັນຢ່າງດີ ມັນຍັງອາດເປັນເທັກໂນໂລຢີທີ່ຈະມາແທນການສະແກນນີ້ວມືໃນອະນາຄົດນຳອີກ.

Facial recognition to unlock Mac laptops.

ສຳລັບໂນດບຸກໃນກຸ່ມ Windows 10 ນັ້ນ ສາມາດໃຊ້ຟີເຈີ້ສະແກນໃບໜ້າ Windows Hello ເພື່ອປົດລ໋ອກເຄື່ອງໄດ້ຢ່າງງ່າຍດາຍ. ສ່ວນ Macbook Air ລຸ້ນໃໝ່ ທີ່ຫາກໍ່ອອກມາ ໃນເດືອນ ພະຈິກ 2018 ນີ້ ກໍ່ສາມາສະແກນລາຍນີ້ວມືໄດ້ແລ້ວ.

ມັນຄົງຈະດີຫຼາຍຖ້າວ່າ MacBook ລຸ້ນໃໝ່ສາມາດໃຊ້ Face ID ໄດ້ຄືຢູ່ iPhone

3.ສາກແບບໄລ້ສາຍ

ໃນຄວາມຈິງແລ້ວການສາກແບບໄລ້ສາຍນັ້ນ ຂ້ອນຂ້າງຈະເໝາະສົມກັບໂນດບຸກຫຼາຍກວ່າໃນສະມາດໂຟນຊ້ຳ.

ຕົວຢ່າງໃນກໍລະນີທີ່ຕ້ອງວ່າງໂນດບຸກເທິງໜ້າໂຕະເພື່ອເຮັດວຽກໃນແຕ່ລະມື້ ມັນຄົງຈະດີຖ້າວາງເທິງບ່ອນສາກແບບໄລ້ສາຍ ເພື່ອສາກໄຟໄປພ້ອມໃນເວລາເຮັດວຽກ ໂດຍບໍ່ຕ້ອງເອົາສາຍສາກມາສຽບໃສ່ຄອມ.

ເຖິງວ່າ Dell ຈະເຄີຍເປີດຕົວໂນດບຸກທີ່ມາພ້ອມກັບເທັກໂນໂລຢີການສາກແບບໄລ້ສາຍ ໃນປີ 2017 ທີ່ຜ່ານມາ ແຕ່ມັນກໍ່ບໍ່ໄດ້ຮັບຄວາມນິຍົມພໍເທົ່າໃດ ແລະ ຍັງຕ້ອງໃຊ້ເວລາໃນການພັດທະນາຕໍ່ອີກຫຼາຍ.

4. ກັນນ້ຳ

ການພັດທະນາໂນດບຸກໃຫ້ມີມາດຕະຖານການກັນນ້ຳນັ້ນ ເປັນສິ່ງທີ່ທ້າທາຍຫຼາຍ ສຳລັບນັກອອກແບບ ເນື່ອງຈາກມີຫຼາຍສ່ວນທີ່ນ້ຳສາມາດເຂົ້າເປັນສ້າງຄວາມເສຍຫາຍໃຫ້ໂນດບຸກໄດ້ງ່າຍ ເຊັ່ນແປ້ນພິມເປັນຕົ້ນ.

5. ຂອບຈໍບາງ

ດ້ວຍຂອບຈໍທີ່ບາງລົງຈະຊ່ວຍໃຫ້ໂນດບຸກສາມາດສະແດງພາບໄດ້ກວ້າງຂຶ້ນ ໂດຍທີ່ຂະໜາດເຄື່ອງຍັງເທົ່າເກົ່າ.

ກ່ອນໜ້ານີ້ Dell ແລະ Huawei ໄດ້ເປີດຕົວໂນດບຸກ XPS ແລະ MateBook X Pro ມາກ່ອນແລ້ວ ແຕ່ຍັງບໍ່ໄດ້ຮັບຄວາມນິຍົມຈາກຜູ້ໃຊ້ຫຼາຍ.

ທີ່ມາ Business Insider, Beartai