ທ່ານ  ສັກໄຊ ວົງມາລາສິດ ນັກທຸລະກິດທີ່ເວົ້າແທ້ ທຳຈິງ!!

ໃນວັນທີ່ 27 ພະຈິກ 2018 ທີ່ຜ່ານມານີ້ ໄດ້ມີພິທີມອບ-ຮັບຂົວນາບົງບົງ ທີ່ໄໄດ້ສຳເລັດການກໍ່ສ້າງຢ່າງເປັນທາງການ ຈາກການຊ່ວຍເຫຼືອໂດຍທຶນສ່ວນຕົວຂອງທ່ານ ສັກໄຊ ວົງມາລາສິດ (ປີເຕີ ຈັນ) ລວມມູນຄ່າກໍ່ສ້າງທັງໝົດປມານ 104 ຕື້ກວ່າກີບ. ຂົວດັ່ງກ່າວມີຊື່ວ່າ ຂົວຕົວ-ກຽວ ເຊິ່ງມີຄວາມຍາວ 236 ແມັດ ແລະ ມີໜ້າຂົວກວ້າງ 11 ແມັດ ລວມທາງຍາງ 1,5 ແມັດ.

ບາງທ່ານອາດຍັງຈື່ເຫດການເຮືອຂົນສົ່ງ ນັກຮຽນໄປສອບເສັງຫລົ້ມຢູ່ບ້ານນາບົງ-ທ່າກົກໄຮຢູ່ເມືອງປາກງື່ມໃນປີ 2015 ເວລານັ້ນມີນັກຮຽນເສຍຊີວິດປະມານ 14 ຄົນ ແລະ ກໍເປັນເຫດການສະເທືອນໃຈ ແລະ ເສົ້າສະຫລົດໃຈທີ່ສຸດ. ຈາກເຫດການດັ່ງກ່າວເຮັດໃຫ້ນັກທຸລະກິດໃຈບຸນ ຊື່ວ່າ ທ່ານ ສັກໄຊ ວົງມາລາສິດ (ປີເຕີຈັນ) ອະດີດປະທານ ບໍລິສັດ ລາວເວີນ ມະຫາຊົນ ຫຼື ທີ່ຮູ້ຈັກກັນດີໃນຊື່ ລາວ-ໄອເຕັກ (ແຕ່ປະຈຸບັນໄດ້ຂາຍຮຸ້ນໃຫ້ ທ່ານ ທັດນະຄອນ ທຳມະວົງ ແລະ ເປັນປະທານຄົນປະຈຸບັນຂອງ ລາວ-ໄອເຕັກ)  ໄດ້ປະກາດສະຫລະເອົາຊັບສ່ວນຕົວມາສ້າງຂົວແຫ່ງນີ້ ແລະ ຈະບໍ່ໃຫ້ນັກໄດ້ເຮືອຂ້າມອີກຕໍ່ໄປ

ຂົວດັ່ງກ່າວແມ່ນ ມີ​ຄວາມ​ສໍາຄັນ​ຫລາຍທີ່ສຸດ ເຊິ່ງບໍ່​ພຽງ​ແຕ່ຈະ​​ອໍານວຍ​ຄວາມ​ສະດວກສະບາຍ​​ ໃຫ້​ພໍ່​ແມ່​ປະຊາຊົນ, ນັກ​ຮຽນ​ນັກ​ສຶກສາ ​ແລະ ທຸກ​ຊັ້ນ​ຄົນ​​​ໃຊ້​ສັນຈອນ​ໄປມາ, ແຕ່​ຍັງ​ຊ່ວຍ​ຊຸກ​ຍູ້ການພັດທະນາ​ເສດຖະກິດ-ສັງຄົມ​ ລະຫວ່າ​ງ​ເມືອງ, ນະຄອນຫລວງ ​ແລະ ​ເມືອງ​ອ້ອມ​ຂ້າງ ​ເນື່ອງ​ຈາກ​​ຂົວ​ແຫ່ງ​ດັ່ງກ່າວ, ​ສາມາດ​ເຊື່ອມ​ຈອດ​ກັບ​ເສັ້ນທາງ​ 13 ​ໃຕ້ ​ຈະ​ອຳນວຍ​ຄວາມ​ສະດວກ, ປະຢັດ​ເວລາ​ໃນ​ການ​​ເດີນທາງ ສິ່ງ​ສຳຄັນຈະເຮັດ​ໃຫ້​ປະຊາຊົນ ​ແລະ ​ຊາວ​ຄ້າຂາຍ​ຫັນ​ມາ​ໃຊ້​ຂົວ​​ແຫ່ງ​ນີ້ຫລາຍ​ຂຶ້ນ​ ໃນ​ການ​ຂົນ​ສົ່ງ​ສິນຄ້າ​ ​ແລະ ຜົນ​ຜະລິດ.


ກ່າວໂດຍ ທ່ານ ສັກໄຊ ວົງມາລາສິດ ໃນມື້ວາງສີ​ລາ​ເລີກ​ໂຄງການ​ກໍ່ສ້າງ​ຂົວ​ດັ່ງກ່າວ ​ໃນ​ວັນ​ທີ 5 ກຸມພາ 2016

ນອກນັ້ນໃນມື້ຈັດພິທີມອບ-ຮັບດັ່ງກ່າວ ທ່ານ ສັກໄຊ ວົງມາລາສິດ (ປີເຕີ ຈັນ) ຍັງໄດ້ບໍລິຈາກເງິນຈຳນວນປະມານ  85 ລ້ານກີບໃຫ້ແກ່ນ້ອງໆນັກຮຽນ.